पोखराको वडा नं‍ ४ मा सडक भासिएको छ । लगातारको भारी वर्षाका कारण फिर्केखोला नजिकैको बूढानीलकण्ठ किरियाकर्म भवन अगाडिको बाटो करिब १५ मिटर भासिएको वडाध्यक्ष देवीकृष्ण पराजुलीले जानकारी दिए ।

आज बिहान सडक भासिँदा एक घर जोखिममा परेको छ । सडक वारि र पारि गरेर पूर्ण रुपमा भासिएको र घरको बाहिरी भाग ठीक भएपनि भित्री कोठा भासिएको वडाध्यक्ष पराजुलीले बताए । उनले भने, ‘घर ओडारजस्तो भएको छ।’

क्षति पुगेको ठाउँमा पोखरा महानगर उपमेयर मञ्जुदेवी गुरुङलगायतको टोलीले स्थलगत निरीक्षण गरेको छ। भासिएको सडक मर्मत गरी सञ्चालनमा ल्याइने महानगरले बताएको छ ।