काठमाडौं । नेपाली कांग्रेसका  केन्द्रीय सदस्य नैनसिंह महरले नेताहरु र राजनीतिक दलहरु सुध्रिनुको विकल्प नभएको बताएका छन् ।

नेपाली काङ्ग्रेस मधेश–प्रदेश कार्यसमिति द्वारा आयोजित २०७९ सालमा स्थानीय तहमा निर्वाचित जनप्रतिनिधिहरुको सम्मानमा बधाई तथा शुभ–कामना कार्यक्रम एवं अभिमुखिकरण कार्यक्रमलाई सम्बोधन गर्दै नेता महरले यस्तो बताएका हुन् ।

महरले वडासदस्यदेखि नै सुधारको सुरुवात गर्नुपर्ने औल्याए । पूर्वप्रधानमन्त्री कृष्ण प्रसाद भट्टराईले प्रधानमन्त्री निवास छाड्दा रित्तो हात फर्किएको स्मरण गर्दै महरले समग्र नेपाल र समग्र मधेशको जनजीवनको उन्नती र प्रगतिका लागि राजनीतिलाई जनसेवा बनाउनुपर्नेमा जोड दिए ।

नेपाली कांग्रेस जनकपुरलाई एसियाको सांस्कृतिक राजधानी बनाउने देखि लिएर विरगन्जलाई आर्थिक राजधानी बनाउने लगायत एजेण्डा बोकेर अगाडी बढेको बताए ।

मधेश प्रदेशमा आवश्यकता हुदाहुदै अहिलेसम्म एउटा पनि विश्वविद्यालय, मेडिकल कलेजको स्थापना हुन नसक्नु दुःखद भएको बताउदै महरले त्यो कुरा नेपाली कांग्रेसको नेतृत्वमा मात्रै सफल हुने दाबी गरे ।