काठमाडौँ । नेपाली कांग्रेसमा सभापति शेरवहादुर देउवा र अर्का नेता कृष्ण सिटौलाबीच सहमति भएको छ । महाधिवेशनका दुई नेताबीच मिलेर जानेमा सहमति भएको बताइएको छ । सहमति अनुसार सभापतिमा देउवालाई समर्थन गर्दै महामन्त्रीमा युवा नेता प्रदीप पौडेललाई अगाडि सारिएको छ ।

सिटौलाले पौडेललाई महामन्त्री उठाउन  सहमति गरेका हुन् । आज भएको उद्घाटन समारोहमा पनि उनले पौडेललाई युवा नेता भनेर प्रचार गरेका थिए । उनी नेपाल विद्यार्थी संघको अध्यक्ष समेत भइसकेका हुन । हाल कांग्रेसको केन्द्रीय सदस्य रहेका छन् ।

काग्रेसको १३ औ महाधिवेशनमा पनि सिटौलाको साथ पाएर देउवा सभापतिमा निर्वाचित भएका थिए । यसपटक पनि उनै सिटौलाको साथमा देउवा फेरि पनि सभापति हुन दाउमा  रहेका छन् । सिटौला पक्षबाट सहमहामन्त्रीमा उमाकान्त चौधरीलाई उम्मेदवार बनाउने सहमति भएको छ ।

आजदेखि शुरु भएको कांग्रेसको महाधिवेशनमा यही मंसिर २७ गतेसम्म हुने छ । महाधिवेशनमा देउवा पक्ष र रामचन्द्र पौडेल पक्षबीच चुनावी प्रतिस्पर्धा हुने भएको छ ।