काठमाडौँ । नेपाली कांग्रेसले उपराष्ट्रपतिमा जनता समाजवादी पार्टीका संसदीय दलका नेता रामसहायप्रसाद यादवलाई मत दिने भएको छ ।

उपराष्ट्रपति निर्वाचनमा सबैभन्दा बढी मत भएको कांग्रेसले कार्यसम्पादन समिति बैठकबाट रामसहायलाई उपराष्ट्रपतिमा मत दिने निर्णय गरेको हो ।

आज पार्टी केन्द्रीय कार्यालय सानेपामा बसेको केन्द्रीय कार्यसम्पादन समिति बैठकले गठबन्धनबाट साझा उम्मेदवार रहेका उपराष्ट्रपति निर्वाचनमा रामसहायप्रसाद यादवलाई मतदान गर्ने निर्णय गरेको प्रवक्ता डा. प्रकाशशरण महतले जानकारी दिए ।

उपराष्ट्रपतिको निर्वाचन चैत ३ गते हुँदैछ । प्रवक्ता डा. महतले कांग्रेसले पार्टीबाट प्रतिनिधि सभा, राष्ट्रिय सभा र प्रदेश सभामा निर्वाचित भएका सदस्यहरूलाई यादवका पक्षमा मतदान गर्न निर्देशनसमेत दिएको छ।

उपराष्ट्रपतिमा यादवसँगै एमालेकी उपाधयक्ष अष्टलक्ष्मी शाक्य र जनमत पार्टीका ममता झा पनि उम्मेदवार छन् ।