काठमाडौं । सत्तागठबन्धनमा लफडा सुरु भएको छ । मंगलबार नेपाली कांग्रेस र एकीकृत समाजवादीलाई समेटेर मधेस प्रदेशका मुख्यमन्त्री सरोजकुमार यादवले मन्त्रिपरिषद् विस्तार गरेपछि लफडा सुरु भएको हो ।

माओवादी केन्द्रले मधेस प्रदेश सरकारबाट बाहिरिने निर्णय गरेको छ । माओवादी संसदीय दलको बैठक बसेर सरकारबाट बाहिरिने निर्णय गरेको एक नेताले जानकारी दिए । सोमबार बसेको सत्तागठबन्धन बैठकमा मधेस सरकार विस्तारको विषयमा छलफल भएको थियो । मंगलबार पनि बैठक बस्ने भनिएको थियो । तर मुख्यमन्त्री यादवले मंगलबार बिहानै कांग्रेस र एकीकृत समाजवादीबाट मन्त्री नियुक्त गरेपछि माओवादी मधेस सरकारबाट बाहिरिने निर्णय गरेको हो ।

कांग्रेस मधेस प्रदेशका संसदीय दलका नेता कृष्णप्रसाद यादवलाई भौतिक पूर्वाधार मन्त्रालयको जिम्मेवारी र वीरेन्द्रप्रसाद सिंहलाई स्वास्थ्य तथा जनसंख्या मन्त्रालयको जिम्मेवारी दिइने भएको छ । नवनियुक्त मन्त्रीहरूको आजै शपथग्रहणको समय मुख्यमन्त्री तथा मन्त्रिपरिषद्को कार्यालयले तोकेको छ ।