काठमाडौं । सरकारले रिक्त रहेका सातमध्ये ६ कूटनीतिक नियोगका लागि राजदूत सिफारिस गरेको छ ।

मंगलबार बसेको मन्त्रिपरिषद् बैठकले क्यानडाबाहेक अन्य स्थानमा ६ जना सहसचिवलाई राजदूतमा सिफारिस गरेको हो।

न्युयोर्कस्थित संयुक्त राष्ट्र संघका लागि स्थायी नियोगमा सहसचिव लोकबहादुर थापालाई सिफारिस गरिएको छ ।

त्यस्तै राष्ट्रसंघीय नियोग जेनेभाका लागि सहसचिव रामप्रसाद सुवेदी, फ्रान्सका लागि सहसचिव सुधीर भट्टराई राजदूतमा सिफारिस भएका छन्।

थाइल्यान्डका लागि सहसचिव धनबहादुर ओली र यूएईका लागि तेजबहादुर क्षेत्रीलाई सिफारिस गरिएको छ। यस्तै, प्रशासन प्रमुख धनश्याम लम्साल कुवेतका लागि राजदूतमा सिफारिस भएका छन् ।