जिल्ला समन्वय समिति (जिसस) चितवनको प्रमुखमा नेकपा एमालेका नारायणप्रसाद अधिकारी गोला तानेर विजयी भएका छन् । उनको प्रतिष्पर्धी नेपाली कांग्रेसका पूर्णबहादुर रानाभाट थिए ।

गोला प्रथा हुँदा संयोजकसहित बहुमत सदस्य एमालेले जितेको छ । आज (मंगलबार) भएको मतदानमा जिसस संयोजकसहित सदस्य पदहरूमा समान मत आएपछि गोला प्रथा भएको थियो । जिसस गठनका लागि पालिका प्रमुख र उपप्रमुखले मतदान गर्छन् ।

सात पालिका रहेको चितवनमा एमाले एक्लैले सात प्रमुख र उपप्रमुख र सत्तारूढ गठबन्धनका दलहरूले पनि प्रमुखरउपप्रमुख गरी सात पदमा जित हात पारेको थियो । जिसस गठनमा एमाले र नेकपा एकीकृत समाजवादीबीच तालमेलको योजना पनि थियो । फलस्वरूप एमालेले जिसस उपप्रमुखमा उम्मेदवारी नै दिएनन ।

जसका कारण समाजवादीले जिसस उपप्रमुख उम्मेदवार बनाएकी कल्पना काफ्ले सापकोटा निर्विरोध भएकी थिइन् । यस्तै एक जना महिला सदस्यमा पनि एमालेले उममेदवारी दिएन । सदस्यमा उठेकी समाजवादीकी उम्मेदवार पूजा गुरुङले एमालेको समेत गरी १४ मत ल्याइन् । तर समाजवादीका मतदाताले गठबन्धन बाहिर गएर एमालेका कुनै पनि उम्मेदवारलाई मतदान गरेनन् ।