पर्यटन, संस्कृति तथा नागरिक उड्डयनमन्त्री प्रेम आलेले ४८ घण्टाभित्र पदबाट राजीनामा दिने बताएका छन् । आज ९शुक्रबार० बसेको नेकपा एकीकृत समाजवादीको पोलिटब्युरो बैठकमा मन्त्री आलेले यस्तो बताएका हुन् ।

पार्टीले ६ महिनाका लागि आफूहरुलाई सरकारमा पठाएको र थप २ महिनामा काम गर्ने अवसर पाएको मन्त्री आलेले बताएको एक पोलिटब्यूरो सदस्यले जानकारी दिए । मन्त्री आलेलाई उद्धृत गर्दै उनले भने, ‘मन्त्रीहरु फिर्ता गर्न छापामार शैलीमा निणर्य भयो ।’ आलेले पार्टीको पछिल्लो निणर्यले आफूहरूको आत्मसम्मानमा चोट पुगेको भन्दै भने, ‘त्यसले हाम्रो आत्मसम्मानमा चोट लगाउने काम भएको छ । पार्टीले गरेको निणर्यलाई मान्दै ४८ घण्टाभित्र राजीनामा दिन्छु ।’

एकीकृत समाजवादीले यसअघि नै चार मन्त्रीलाई फिर्ता गर्ने र अन्यलाई पठाउने सिफारिस गरे पनि निणर्य कार्यान्वयन हुन सकेको छैन । ४ मन्त्रीसहित १० सांसदहरुले असन्तुष्टि जनाउँदै शुक्रबार नै संसदीय दलको बैठक बोलाउन माग गरेका छन् ।