राष्ट्रिय सभा सदस्य नारायणकाजी श्रेष्ठले अमेरिकी स्टेट पार्टनर सीप प्रोग्राम (एसपीपी) सम्झौता अस्वीकार गरेको पत्र तत्काल अमेरिकी सरकारलाईपठाउन आग्रह गरेका छन् ।

राष्ट्रिय सभाको आज (बिहीबार) को बैठकमा बोल्दै श्रेष्ठले एसपीपी सम्झौता कार्यान्वयन नगर्ने पत्र पठाउन सरकारको ध्यानाकर्षण गराएका हुन् ।

उनले भने, ‘एसपीपी एग्रिमेण्टबारे राष्ट्रव्यापी बोल्यौं । नेपाललाई सैन्यमोर्चातर्फ धकेलिने कार्य गर्नु हुँदैन भन्यौं । परिणामस्वरुप त्यसलाई अघि नबढाउने निर्णय सरकारले गर्‍यो । सरकारले अहिलेसम्म पत्र लेखेन । पत्र लेख्नुपर्‍यो । सरकारको तर्फबाट हामी एसपीपीलाई अघि नबढाउने र यस प्रकारका सम्झौता नगर्ने निणर्य गरेका छौं भनेर अमेरिकी सरकारलाई पत्र पठाउनु पर्‍यो ।’ कुनै पनि सैनिक गठबन्धन वा शक्ति राष्ट्रहरुसँग अन्तर्निहीत हुने कुनै पनि कदम चाल्न सरकार तयार हुन नहुने उनले बताए ।