काठमाडौं । प्रधानमन्त्री शेरबहादुर देउवाले अहिले प्रहरीका लागि हतियार किन्ने सरकारको योजना नरहेको बताए।

ललितपुर सानेपामा जारी कांग्रेस केन्द्रीय कार्य समितिको बैठकमा नेताहरुले उठाएका प्रश्नको आज जवाफ दिने क्रममा देउवाले यस्तो बताएका हुन ।

कांग्रेस सभापतिसमेत रहेका देउवालाई नेता गोपालमान श्रेष्ठले देश आर्थिक संकटमा परिरहेका बेला हतियार किन्न ठीक नहुने सुझाव दिए ।

पछिल्लो ७ वर्षदेखि हात हतियार खरिद नगर्दा चरम अभाव झेल्नु परेको गुनासो नेपाल प्रहरीले गरिरहेको छ।

सरकारले हातहतियार खरिदका लागि नेपाल प्रहरीलाई बजेट विनियोजन गरेपछि प्रक्रिया अगाडि बढाएको थियो। तर खरिद प्रक्रिया र मूल्यलाई लिएर पनि यो कुरा विवादित बनेको छ।