बजेट प्रकरणमा विवादित बनेपछि राजीनामा दिएका जनार्दन शर्मा पुनः अर्थमन्त्री बन्ने भएका छन् । माओवादी केन्द्रका अध्यक्ष पुष्पकमल दाहाल प्रचण्डले आज बिहान प्रधानमन्त्री शेरबहादुर देउवालाई भेटेर शर्मालाई नै अर्थमन्त्री नियुक्त गर्न सिफारिस गरेका छन् ।

उनलाई आजै शपथ ग्रहण गराउने तयारी छ । शर्माको शपथको कार्यक्रम प्रधानमन्त्री तथा राष्ट्रपतिको कार्यालयले तय गर्ने प्रचण्ड निकटका एक पोलिटब्युरो सदस्यले बताए । बजेट भाषणको अघिल्लो रात अनधिकृत मानिसहरुलाई अर्थमन्त्रालयभित्र छिराएर करका दरमा हेरफेर गरेको भन्दै विवादमा आएपछि २२ असारमा उनले अर्थमन्त्री पदबाट राजीनामा दिएका थिए ।

अर्थमन्त्री शर्माले केही व्यवसायीलाई अनुकूल हुने गरी राजस्वका दरहरू हेरफेर गरेको आरोप लागेको थियो । करको दर हेरफेर गर्न उनले बजेट भाषणको अघिल्लो रात (जेठ १४ गते) राजस्व प्रशासनमा लामो समय काम गरेर अवकाश भएका नायब सुब्बा रघुनाथ घिमिरे र अर्का एक चार्टर्ड एकाउन्टेन्टलाई अर्थ मन्त्रालयमा प्रवेश गराएको उनीमाथि आरोप लागेको थियो ।

यसअघि पनि पदीय मर्यादा बिर्सेर विभिन्न विवादास्पद काम गरेपछि उनी आलोचित बन्दै आएका छन् । शर्मामाथि छानबिन गर्न गठित संसदीय विशेष समितिले बजेट निर्माणका क्रममा अनियमितता गरेको नदेखिएको ठहर गर्दै सफाइ दिएको छ ।

संसदीय समितिबाट क्लिन चिट पाएका शर्मा फेरि अर्थमन्त्रालयमा फर्किन बाटो खुला भएसँगै माओवादीले उनलाई नै दोहोर्‍याउने भएको हो ।