काठमाडौँ, । नेकपा (एमाले)ले पार्टीको केन्द्रीय कमिटी बैठक अगामी भदौ १० र ११ गते बोलाएको छ । 

आज बसेको सचिवालय बैठकले प्रतिनिधि सभा र प्रदेश सभा निर्वाचनको तयारी गर्नका लागि भदौ १० र ११ गते केन्द्रीय कमिटी बैठक बोलाउने निर्णय गरेको प्रचार विभाग प्रमुख पृथ्वीसुब्बा गुरुङले जानकारी दिए । 

बैठकले पार्टी स्थायी कमिटीको बैठक भदौ ७ गते, पोलिटब्यूरो बैठक भदौ ९ गते वोलाउने समेत निर्णय गरेको छ । 

बैठकले अध्यक्ष केपी शर्मा ओलीको अध्यक्षतामा आठ सदस्यीय निर्वाचन घोषणापत्र मस्यौदा कमिटी गठन गरेको छ । 

कमिटीमा बरिष्ठ उपाध्यक्ष ईश्वर पोखरेल, उपाध्यक्षहरु अष्ठलक्ष्मी शाक्य, रामबहादुर थापा, विष्णु पौडेल, महासचिव शंकर पोखरेल, उपमहासचिवद्वय प्रदीप ज्ञवाली र विष्णु रिमाल रहेका छन् ।

बैठकले अध्यक्ष  ओलीको अध्यक्षतामा निर्वाचन परिचालन कमिटी गठन गरेको छ । जसमा केन्द्रीय कमिटी, केन्द्रीय निकाय तथा केन्द्रीय सल्लाहकार परिषद्का पदाधिकारी, प्रदेश कमिटीका अध्यक्ष, पार्टीको केन्द्रीय विभागका सचिवहरु र जनसंगठनका अध्यक्षहरु र महासचिवहरु रहेका छन् ।