झापा, ।  विर्तामोडस्थित पूर्वाञ्चल क्यान्सर अस्पतालमा क्यान्सर रोगको अवस्था पत्ता लगाउने ‘पेट सिटी स्क्यान’ सेवा शुरु गरिएको छ । 

‘पेट सिटी स्क्यान’ सेवा शुरु भएपछि अब कुनै पनि क्यान्सरका विरामी  उपचारका लागि विदेश जानुपर्नेको अवस्थाको अन्त्य भएको छ । 

दुई बर्ष अघि अस्पातालले ‘पेट सिटीस्क्यान’ उपकरण ल्याए पनि सरकारले  रेडियो धर्मी सम्बन्धि ऐन नियम नबनाएका कारणले संचालन आउन सकेको थिएन । 

‘पेट सिटीस्क्यान’ को सेवा शुरु भएपछि  क्यान्सर उपचारका लागि  भारत लगायत छिमेकी मुलुक जानुपर्ने अवस्थाको अन्त्य भएको अस्पतालका मेडिकल निर्देशक डा. वीरेन्द्र यादवले बताए । 

“क्यान्सर रोगको उपचारका लागि धेरै नेपाली भारत लगायत मुलुकमा जाने गरेका थिए,” उनले भने, “अव हामीले नै  पेट सिटीस्क्यानको सेवा न्यूनतम शुल्कमा दिएपछि बाहिर मुलुकमा उपचारका लागि जानु पदैन ।”

उनका अनुसार ‘पेट सिटीस्क्यान’ उपकरणले क्यान्सर रोगको अवस्थाबारे जानकारी गराउने र जसले गर्दा क्यान्सरको उपचारमा गर्न सजिलो हुन्छ । 

“क्यान्सर कति फैलिएको छ । उपचारपछि निको कति भयो कति भएन । सवै कुराको थाहा उपकरणबाट पत्ता लाग्ने गर्दछ,” उनले भने, “ उपकरण संचालन भएपछि अब जस्तो सुकै क्यान्सरको उपचार हामी गर्न सक्दछौ ।”

पूर्वाञ्चल अस्पताल बाहेक काठमाडौँमा रहेका दुईवटा प्रयोगशालामा समेत पेट सिटीस्क्यान सेवा दिने गरेका छन् । 

४५ हजारमा नै ‘पेट सिटीस्क्यान’ 

अस्पतालले अन्य ठाउँभन्दा सस्तोमा ‘पेट सिटीस्क्यान’ सेवा दिने भएको अस्पतालका निर्देशक डा. यादवले बताए ।

‘पेट सिटी स्क्यान’ सेवा अस्पतालले ६० हजारमा उपलब्ध गराएपनि अहिले दुई महिनासम्म विरामीलाई ४५ हजारमा नै उपलब्ध गराउने उनको भनाई रहेको छ । भारतमा ‘पेट सिटीस्क्यान’ सेवाको लागि जादा करिब रु पाँच लाखसम्म  खर्च हुने गरेको छ । 

‘पेट सिटी स्क्यान’ सेवाका लागि ‘रेडियो आइसोटोप’ समेत प्रयोग गरिन्छ । उक्त रेडियो आइसोटोप ल्याएको चार घण्टाभित्र बिरामीको उपचारका लागि प्रयोग गरिसक्नुपर्ने हुन्छ । 

भारतको कोलकताबाट खरिद गरेको दुई घण्टामा झापाको वित्तामोडमा उक्त ‘रेडियो आइसोटोप’ आइपुग्ने र बिरामीलाई समेत सजिलै उपचार गर्न सकिने अस्पतालका निर्देशक डा यादवले जानकारी दिए ।

अस्पतालका क्यूक्लियर मेसिडिन डा. रितेश उपाध्यायले क्यान्सरको उपचारका गर्दा पटक पटक ‘पेट सिटी स्क्यान’ गर्नुपर्ने बताए  । 

उनले क्यान्सरको उपचार शुरु हुनुभन्दा अगाडि, उपचारको बीचमा र उपचारपछि निको भयो कि भएन भनेर ‘पेट सिटी स्क्यान’ उपकरणबाट परीक्षण गर्ने गरिन्छ ।

“क्यान्सर उपचारपछि निको भयो कि भएन । उपचारलाई परिवर्तन गर्नुपर्ने हो वा होइन समेत ‘पेट सिटी स्क्यान’बाट थाहा हुन्छ,” उनले भने, “ ‘पेट सिटी स्क्यान’ अन्य रोगको पनि उपचारका लागि पनि प्रयोग गरिन्छ ।”

उनले क्यान्सरको उपचारका लागि ‘पेट सिटी स्क्यान’ अनिवार्य रहेको भन्दै  शरिरको पुरै भागको स्क्यान गरि क्यान्सरको अवस्था पत्ता लाग्ने बताए । 

अस्पतालका जनसम्पर्क अधिकृत प्रमिस गिरीले दैनिक १०–१२ जना विरामीको ‘पेट सिटी स्क्यान’ सेवा दिन सक्ने  बताए । 

उनका अनुसार २५ जना क्यान्सर विरामीको ‘पेट सिटी स्क्यान’ गर्न तयारी अवस्थामा राखिएको छ । 

अस्पतालमा दैनिक १२५ जना क्यान्सरका विरामी आउने गरेका छन् । अस्पतालमा काठमाडौँ लगायत देशभरिका विरामी आउने गरेका छन् ।