काठमाडौँ । नेकपा एमालेको दशौँ राष्ट्रिय महाधिवेशनमा नयाँ नेतृत्व चयनका लागि अहिले बिहान ४ बजेदेखि मतदान सुरु भएको छ ।

अध्यक्ष केपी शर्मा ओलीले सर्वसम्मतको प्रयास गरेपनि विभिन्न १०  पदका लागि निर्वाचन भइरहेको छ । अध्यक्ष ओलीले पहिलो पटक मतदान गरेर उद्घाटन गरेका थिए । 

अहिले लामबद्ध रहेका महाधिवेशन प्रतिनिधिले मतदान गरिरहेका छन् । प्रतिनिधिले विद्युतीय मेसिनबाट मतदान गरिरहेका छन् । अध्यक्षमा  ओली र भीमबहादुर रावलबीच प्रतिस्पर्धा भइरहेको छ ।

 एमाले निर्वाचन आयोगका अध्यक्ष डा विजय सुब्बाका अनुसार १० वटा पदमा मात्रै मतदान भैरहेको छ । जसमा केन्द्रीय सदस्यका लागि खुला, भौगोलिक र समावेशी समूह गरी ७ पदका लागि र पदाधिकारीमा अध्यक्ष, उपाध्यक्ष र सचिव पदमा ३ गरी १० पद रहेको छ । यसअघि केही पदमा भने  सर्वसम्मत भएको छ ।

मतदानमा ९२ वटा विद्युतीय मेसिन प्रयोग गरिएको छ । मतदान सकिएको दुई घण्टामा नै नतिजा घोषणा गर्ने उनले जानकारी दिए ।