काठमाडौं । नेपाली कांग्रेसको जारी महाधिवेशन अन्तर्गत भइरहेको सभापतिको दोस्रो चरणको मतदानमा तीन हजारभन्दा बढीले मतदान गरेका छन् ।  दिउँसो साढेतीन बजेबाट शुरु भएको मतदानमा तीन हजार भन्दा बढीले मतदान गरेको  निर्वाचन समितिले जनाएको छ । निर्वाचन सके लगतै मतगणना हुने छ । राती अबेरभित्रमा मतपरिमाण आइसक्ने समितिले जनाएको छ । 

चार हजार ७४३ जना मतदाता रहेको महाधिवेशनमा पहिलो चरणमा भने चार हजार ६८१ जनाले मतदान गरेका थिए ।

राष्ट्रिय सभागृहमा जारी मतदानका लागि ६ वटा बुथ राखिएको छ । सभापतिका लागि पहिलो चरणमा बढी मत पाएका शेरबहादुर देउवा र शेखर कोइराला मैदानमा छन् ।

पहिलो चरणमा देउवा, कोइराला, प्रकाशमान सिंह, विमलेन्द्र निधि र कल्याण गुरुङबीच प्रतिस्पर्धा भएको भए पनि कुनै उम्मेदवारले ५० प्रतिशत भन्दा धेरै मत पाउन नसकेपछि दोस्रो चरणको मतदान भएको हो।