काठमाडौँ, । नेपाली काँग्रेसको दुई जना महामन्त्री पदका लागि भएको निर्वाचनमा गगन थापा र विश्वप्रकाश शर्मा विजयी भएका छन् । आज  पार्टी कार्यालय सानेपामा भएको मतगणनामा थापा र शर्मा बिजय भएका हुन् । 

महामन्त्रीमा डा प्रकाशशरण महत, मीनेन्द्र रिजाल, राजाराम कार्की र प्रदीप पौडेल भने पराजित बन्न पुगे । थापाले सवभन्दा बढी मत ल्याई बिजय भएका छन् । खसेको कुल ४६८२ मतमध्ये थापाले ३०२३ मत पाए भने विश्व प्रकाश शर्माले १९८४ मत प्राप्त गरे । यसैगरी पराजित उम्मेदवारहरू प्रकाश शरण महतले १५५६, प्रदीप पौडेलले १३९३, मिनेन्द्र रिजालले ८०९ र राजाराम कार्की १०६ मत प्राप्त गरे । 

गगन शेखर कोइराला प्यानलबाट चुनाव लडेका थिए भने देउवा पक्षकै भएपनि अन्तिममा टिकट नपाएपछि विश्वप्रकाशचाहिँ प्रकाशमान सिंह प्यानलबाट चुनाव लडेका थिए । 
गगन र विश्वप्रकाश विजयी हुँदा देउवा प्यानलबाट चुनाव लडेका महत र पौडेल पराजित बन्न पुगे । 

कांग्रेसको महाधिवेशनले यसअघि सभापतिमा शेरवहादुर देउवा, उपसभापतिमा पूर्णवहादुर खडका र धनराज गुरुङ निर्वाचित गरिसकेको छ । अहिले सहमहामन्त्रीको मतगणना पार्टी कार्यालयमा भइरहेको छ ।