काठमाडौँ । नेकपा (एमाले)ले पार्टीका केन्द्रीय सदस्य दुर्गा प्रसाईंलाई हटाएको छ ।

आज पार्टी कार्यालय च्यासलमा बसेको १७ औ सचिवालय बैठकले प्रसाईंलाई केन्द्रीय सदस्यबाट हटाउने निर्णय गरेको एमाले प्रचार विभाग प्रमुख पृथ्वीसुब्बा गुरुङले जानकारी दिए ।

प्रसाईलाई प्रदेश नं. १ को एमाले प्रदेश कमिटीले पार्टीको नीति, सिद्धान्तविपरीत गतिविधि गरेको भन्दै  पार्टीबाट निकाल्न यहि फागुन ६ गते केन्द्रलाई सिफारिस गरेको हो । 

एमाले केन्द्रीय सदस्य प्रसाईंले यही फागुन १ गते पूर्वराजा ज्ञानेन्द्र शाह तथा उनका छोरा पारसलाई सहभागी गराई मेचीनगर–६ मा  ‘नागरिक बचाउ महाअभियान’को उद्घाटन गरेका थिए। कार्यक्रममा पूर्वराजा शाह पुग्दा सहभागीहरूले जयजयकार गरेका थिए।

कार्यक्रममा पूर्वराजासँगै पूर्वरानी कोमल शाह, पूर्वराजकुमार पारस, पूर्वराजकुमारी शिताष्म शाह सहभागी भएका थिए। 

प्रसाईलाई एमालेको पहिलो केन्द्रीय कमिटी बैठकबाट केन्द्रीय सदस्यमा मनोनित गरेको थियो । उनी अहिले पार्टीको उद्योग विभाग उपप्रमुख समेत हुन् ।