काठमाडौँ, । नेकपा (एमाले)का पोलिटव्युरो सदस्य खिमलाल भट्टराईले एमाले र नेपाली कांग्रेस मिलेर राष्ट्रलाई संकटबाट जोगाउनुपर्ने बताएका छन् । 

उनले आज सामाजिक सञ्जालमा मंसीर ४ को निर्वाचनको परिणाम र संविधानको प्रावधानलाई आधार बनाएर एमाले र कांग्रेसले मिलेर सरकार संचालन गर्नुपर्ने बताए । 

“निर्वाचनको परिणामले जनमत अनुसार ठूलो दल एमाले बन्यो । संसदको ठूलो दल नेपाली काँग्रेस बन्यो । एउटै दल वहुमत प्राप्त हुन सकेन । यसको अर्थ मिलेर हिड्नु पर्ने जनादेश हो,” उनले लेखेका छन्“ नेकपा एमाले र नेपाली काङ्ग्रेसले मिलेर देश चलाउनु पर्ने  जनादेश हो । यि दलहरु मिल्दा सरकार पनि  सहजरुपमा बन्न सक्दछ ।”

एमाले नेता भट्टराईले पद, पैसा र स्वार्थको लागि च्यॉखे थापेर बॉच्ने अवसरवादी राजनीतिको पनि अन्त्य हुने र यसले नै राजनीतिक स्थायित्व र स्थिरता पनि दिन सकिने बताए । 

उनले मिल्ने आधारको रुपमा  संसदको ठूलो दल हुनुको नाताले काँग्रेसको नेतृत्वमा सरकार र जनमतको ठूलो दल हुनुको नाताले राष्ट्रपति एमालेको हुनुपर्ने समेत बताए ।  

“च्याखे दाउ थापेर सरकारको नेतृत्व गर्ने र देशलाई वर्वाद पार्ने तरिकाबाट अब राजनीतिलाई जोगाउनुपर्दछ  । विलम्ब गर्ने समय छैन । अनेकौ प्रयोगतिर पनि नलागौ । आफ्नो स्वार्थको रोटी सेक्नेतिर पनि नलागौ,” उनले अगाडि भनेका छन् । 

उनले अर्थतन्त्र र राजनीतिमा समस्याहरुको चाङ रहेको उल्लेख गर्दै यसको गहिरो असर समाजका अरु क्षेत्रमा पनि पर्ने र  यसको समाधानको निम्ति सबैभन्दा पहिला राजनीति सुध्रिनु  पर्ने बताए । 

.