काठमाडौं । राष्ट्रिय प्रजातन्त्र पार्टी ९राप्रपा० राष्ट्रपति निर्वाचनको मतदान प्रक्रियामा भाग नलिने भएको छ ।

राष्ट्रपति चयनका लागि बिहीबार हुने निर्वाचनमा कुनै पनि उम्मेदवारलाई भोट नहाल्ने निर्णय राप्रपाले गरेको राप्रपाका प्रवक्ता मोहन श्रेष्ठले जानकारी दिए ।

राप्रपाको बुधबार बसेको केन्द्रीय समितिको बैठकले राष्ट्रपति चुनावमा कुनै पनि उम्मेदवारलाई भोट नहाल्ने निर्णय गरेको प्रचार विभाग प्रमुखसमेत रहेका प्रवक्ता श्रेष्ठले बताए । ‘राप्रपा राष्ट्रपति निर्वाचनमा कुनै पनि उम्मेदवारलाई भोट नहाल्ने, निर्वाचन प्रक्रियामा सहभागी नहुने निर्णय गरिएको छ,’ उनले भने ।

राप्रपा केन्द्रिय समितिमा राष्ट्रपति निर्वाचनमा भोट हाल्न नहुने मत बलियो भएपछि उक्त निर्णय आएको हो ।

राष्ट्रपति चयनका लागि बिहीबार १० बजेदेखि दिउँसो ३ बजेसम्म मतदान कार्यक्रम रहेको छ ।

राष्ट्रपति पदका लागि एमालेबाट सुवासचन्द्र नेम्वाङ र कांग्रेसबाट रामचन्द्र पौडेल उम्मेदवार छन् ।

राप्रपाको दुई हजार २१० मतभार थियो । वर्तमान सत्ता गठबन्धन भन्दा बाहिर रहेको र एमालेसँग नजिक रहेको राप्रपाको यस्तो निर्णयले एमालेका उम्मेदवार नेम्वाङलाई थप अप्ठ्यारो पारेको छ । एमालेले राप्रपाले आफना उम्मेदवारलाई मतदान गर्ने अपेक्षा गरेको थियो ।