काठमाडौं । उपराष्ट्रपति रामसहायप्रसाद यादवले आज पद तथा गोपनीयताको शपथ लिँदैछन् ।

बिहान १० बजे राष्ट्रपति भवन शीतलनिवासमा आयोजना हुने विशेष समारोहमा राष्ट्रपति रामचन्द्र पौडेलले उपराष्ट्रपति यादवलाई पद तथा गोपनियताको शपथ दिलाउने कार्यक्रम तय भएको छ ।  

बारा– २ बाट प्रतिनिधिसभा सदस्य निर्वाचित यादवले आइतबार नै सांसद र जनता समाजवादी पार्टी नेपाल (जसपा) पार्टीको सबै  जिम्मेवारीबाट राजीनामा दिइसकेका छन् ।

यादवले प्रतिनिधिसभाका सभामुख देवराज घिमिरेलाई आफू उपराष्ट्रपतिमा निर्वाचित भएकाले बारा–२ को निर्वचान क्षेत्र रिक्त रहेको  जानकारी गराएका छन् ।

चैत ३ गते सम्पन्न उपराष्ट्रपति निर्वाचनमा ३० हजार ३२८ मतभारसहित यादव एमाले उपाध्यक्ष अष्टलक्ष्मी शाक्य, जनमत पार्टीकी ममता झालाई पराजित गर्दै निर्वाचित भएका थिए। 

निवर्तमान उपराष्ट्रपति नन्दबहादुर पुन पासाङको कार्यकाल चैत ४ गते सकिएको थियो ।