काठमाडौं । नेकपा एमालेले प्रधानमन्त्री पुष्पकमल दाहाल प्रचण्डलाई विश्वासको मत नदिने निर्णय गरेको छ । एमाले संसदीय दलको बैठकले प्रधानमन्त्री दाहाललाई विश्वासको मत नदिने निर्णय गरेको हो ।

संसद् भवन नयाँ वानेश्वरमा बसेको बैठकमा एमाले अध्यक्ष केपी शर्मा ओलीले प्रचण्डलाई विश्वासको मत नदिने प्रस्ताव पेस गरेको थियो । ओलीको त्यो प्रस्ताव सर्वसम्मतीले पारित भएको एमालेका एक सांसदले जानकारी दिए ।

यसअघि २६ पुसमा दाहालले विश्वासको मत लिँदा एमालेले विश्वासको मत दिएको थियो भने सरकारमा पनि सहभागी भएको थियो ।

तर फागुन १० गते प्रधानमन्त्री दाहाल र उनी नेतृत्वको पार्टी माओवादीले राष्ट्रपतिमा एमाले उम्मेदवार सुवासचन्द्र नेम्वाङलाई सहयोग नगरी कांग्रेस उम्मेदवार रामचन्द्र पौडेललाई समर्थन गरेको थियो ।

त्यसपछि एमालेले सरकारलाई दिएको समर्थन १५ फागुनमा फिर्ता लिएर सरकारबाट बाहिरिएको थियो ।

त्यसपछि संसद्मा आफ्नो पक्षमा विश्वास छ भन्ने देखाउन प्रधानमन्त्री दाहालले आज बस्ने संसद् बैठकमा विश्वासको मत लिने प्रस्ताव पेस गर्दैछन् ।