काठमाडौं । राष्ट्रपति रामचन्द्र पौडेल गोरखकालीको मन्दिरमा पूजा गर्न गोरखा जाँदैछन् । राष्ट्रपति बनेपछि पहिलो पटक काठमाडौं बाहिर जान लागेका पौडेल बिहान ९ः३० बजे गोरखा जाने र दरबार क्षेत्र अवलोकन गर्ने कार्यक्रम रहेको सचिवालयले जानकारी दिएको छ ।

राष्ट्रपति पौडेलले गोरखा दरबार क्षेत्रभित्र रहेको गोरखकालीको मन्दिरमा पूजा गर्ने र बजार क्षेत्रमा रहेको पृथ्वीनारायण शाहको शालिकमा माल्यार्पण गर्ने कार्यक्रम तय भएको सचिवालयले जनाएको छ ।

नेपाली सेनाको हेलिकप्टर चढेर गोरखा जाने राष्ट्रपति पौडेलको आगमनलाई लक्षित गरी गोरखाको सुरक्षा व्यवस्था चुस्त बनाइएको र सर्वसाधारण प्रभावित नहुने गरी यातायात तथा सुरक्षा प्रबन्ध मिलाइएको प्रमुख जिल्ला अधिकारी दिनेशसागर भुसालले जानकारी दिए ।

प्रजिअ भुसालका अनुसार राष्ट्रपति पौडेल आउजाउ गर्ने सडकको यातायात होस् या मन्दिरमा दर्शन गर्ने बेलामा होस् सर्वसाधारणलाई असर नपुग्ने गरी आवश्यक प्रबन्ध मिलाइएको छ ।

यसअघि राष्ट्रपति पौडेल साधारण तरिकाले काठमाडौंको बसन्तपुर दरबारमा जाँदा उनको प्रशंसा भएको थियो ।