सुर्खेत । नेकपा एमालेका उपाध्यक्ष तथा पूर्वउपप्रधानमन्त्री विष्णु पौडेलले यो प्रतिनिधि सभाबाट राजनीतिक स्थायित्व सम्भव नभएको बताएका छन् ।

सुर्खेतमा आइतबार बिहान पत्रकारहरूसँग कुराकानी गर्दै उपाध्यक्ष पौडेलले वर्तमान गठबन्धन सरकारबाट समृद्धि नआउने बताए । ‘यो प्रतिनिधि सभाबाट राजनीतिक स्थायित्व सम्भव छैन। यो सरकारले समृद्धि पनि दिन सक्दैन,’ उपाध्यक्ष पौडेलले भने ।

संसद्बाट दोस्रो पटक विश्वासको मत लिएको धेरै दिनसम्म पनि प्रधानमन्त्री पुष्पकमल दाहालले मन्त्रिपरिषद बिस्तार गर्न नसकेको बताए पौडेलले बताए ।

ठूलो संख्यामा उपप्रधानमन्त्रीको दाबी र मन्त्रालयमा मागबण्डा नमिल्दा सरकारले पूर्णता पाउन नसकेको बताउँदै उनले भागबण्डामा अल्झिने सरकारले नागरिकलाई सौलियत दिन नसक्ने बताए । उनले सत्ता गठबन्धनको तमासा जनताले हेरिरहेको पनि बताए।

सरकारलाई आर्थिक क्षेत्रमा देखिएका समस्या र जनताका समस्या समाधानमा नभई पद र जिम्मेवारीमा मात्रै गठबन्धनको ध्यान रहेको आरोप पौडेलको थियो ।

उनले अहिलेको गठबन्धन देशभित्रका राजनीतिक दलले मात्र नभई विदेशीको अबान्छित हस्तक्षेपका बीच बनेको आरोपसमेत लगाएका छन्।