काठमाडौं । सत्ता गठबन्धनमा रहेका दलहरूले आ–आफ्नो अडान नछोड्दा मन्त्रालय मागबण्डामा कुरो मिल्न सकेको छैन । विहान मन्त्रालय भागबण्डा मिलाउन बसेको सत्तारुढ १० दलीय गठबन्धनको बैठकमा न्यूनतम साझा कार्यक्रमलाई अन्तिम रूप दिने र मन्त्रालय भागबन्डामा सहमति जुटाउने छलफल भए पनि कुरा मिल्न सकेन् ।

कुरा नमिलेपछि बिहान बसेको बैठक अहिलेलाई स्थगित भएको र दिउँसो तीन बजे बसेर मन्त्रालय भागबण्डा र न्युनतम साझा कार्यक्रम टुंग्याउने नेपाली कांग्रेसका प्रमुख सचेतक रमेश लेखकले जानकारी दिए ।

बुधबार बिहान बसेको बैठकमा पनि मन्त्रिमण्डल विस्तारबारे सहमति भइनसकेको जनता समाजवादी पार्टीका अध्यक्ष उपेन्द्र यादवले बताए। ‘अहिले लञ्च ब्रेक भयो हामी फेरि ३ बजे बस्छौँ,’ यादवले भने, ‘सहमति भइसकेको छैन।’

नेपाली कांग्रेसका प्रमुख सचेतक लेखकका अनुसार सरकारमा सहभागी दलहरुको न्यूनतम साझा कार्यक्रमको मस्यौदामा साझ पाँच बजेसम्म दलहरूले आफ्ना विषय थप घट गर्ने गरी निर्धारण गरिएको छ।

‘मस्यौदामा साँझसम्म थपघट गरेपछि मात्रै भोलि फाइनल गर्छौ,’ उनले भने, ‘अहिले बैठकमा मूलतः सरकार गठनको कुरा भयो, फेरि भरे छलफलमा बस्छौँ ।’

मंगलबार साँझ बसेको सत्ता गठबन्धनको बैठकमा मन्त्रालय बाँडफाँटबारे छलफल भए पनि दलहरुले धेरै मन्त्रालय मागेपछि सहमति भएको थिएन ।

कांग्रेसले ८, जसपा र नेकपा एसले ३—३ मन्त्रालय पाउनै पर्ने अडान राखेपछि सहमति बन्न सकिरहेको छैन ।

नेपाली कांग्रेसलाई ८, माओवादी केन्द्रलाई ५, राष्ट्रिय स्वतन्त्र पार्टीलाई ३, एकीकृत समाजवादीलाई २, जनता समाजवादी पार्टीलाई २, जनमत पार्टीलाई १, नागरिक उन्मक्ति पार्टीलाई १, लोसपालाई १ मन्त्रालयका साथै स्वतन्त्रबाट १ जनालाई मन्त्री बनाउने प्रस्ताव प्रधानमन्त्री पुष्पकमल दाहालको छ । प्रस्तावमा दलहरूले आ–आफ्नो दाबी राखेर सहमतिमा नआएपछि कुरा मिल्न सकिरहेको छैन ।

प्रधानमन्त्री दाहालले गत चैत ६ मा दोस्रो पटक विश्वासको मत लिएपछि १० चैतसम्म सरकारलाई पूर्णता दिने बताएका थिए । तर, अहिलेसम्म भागबण्डा नमिल्दा मन्त्रिपरिषद् पूर्ण हुन सकिरहेको छैन । मन्त्रालय भागबन्डा नमिल्दा प्रधानमन्त्रीले १६ मन्त्रालय हेर्दै आएका छन्।