काठमाडौं । राष्ट्रपति रामचन्द्र पौडेलको स्वास्थ्य अवस्था अझै स्थिर रहेको छ । शिक्षण अस्पताल मनमोहन कोर्डियोथेरासिक भास्कुलर तथा ट्रान्सप्लान्ट सेन्टरका अनुसार शनिबार बिहानदेखि भर्ना भएका राष्ट्रपति पौडेलको स्वास्थ्य स्थिति स्थिर रहेको र चिकित्सकहरूले उनको मुटुको निगरानी गरिरहेका छन् ।

मुटुमा पुनः समस्या आएपछि शनिबार बिहानै पौडेललाई महाराजगन्जस्थित मनमोहन कोर्डियोथेरासिक भास्कुलर तथा ट्रान्सप्लान्ट सेन्टरमा भर्ना गरिएको थियो ।

केही दिनअघि मात्रै उनलाई माइनर हृदयाघात भएपछि बाँसबारीस्थित गंगालाल हृदय केन्द्रमा भर्ना गरी उपचार गरिएको थियो । उनको मुटुमा एन्जियोप्लास्टी गरेर २४ घन्टाको निगरानीपछि डिस्चार्ज गरिएको थियो । तर शनिबार बिहान फेरि समस्या भएपछि उनलाई अस्पताल भर्ना गरिएको हो ।