काठमाडौँ । सत्तारुढ नेकपा माओवादी केन्द्रसहितका दल मिलेर भाेलि समाजवादी मोर्चा घोषणा गर्ने भएका छन् । बिहान प्रधानमन्त्रीको सरकारी निवास बालुवाटारमा भएको बैठकले मोर्चा घोषणा यही असार ४ गते गर्ने तय गरेको हो।

आज बिहान बालुवाटारमा भएको छलफलमा माओवादी केन्द्रबाट प्रधानमन्त्रीसमेत अध्यक्ष पुष्पकमल दाहाल, वरिष्ठ उपाध्यक्ष नारायणकाजी श्रेष्ठ र महासचिव देव गुरुङ तथा नेकपा एकीकृत समाजवादीबाट अध्यक्ष माधवकुमार नेपाल, जसपाबाट अध्यक्ष उपेन्द्र यादव र नेकपाबाट महासचिव विप्लव सहभागी भएका थिए।

समाजवादी मोर्चामा डा‍‍। बाबुराम भट्टराई अध्यक्ष रहेको नेपाल समाजवादी पार्टी र वामदेव गौतमको संयोजकत्वमा रहेको राष्ट्रिय एकता अभियानसमेत ६ दल समेट्ने तयारी रहे पनि आजको छलफलमा भने बाबुराम र वामदेव सहभागी भएनन्। अर्को बैठक बसेर उनीहरूलाई सहभागी गराउने तयारी भइरहेको नेताहरूले बताएका छन् ।