काठमाडौँ । नेपाल समाजवादी पार्टी (नेसपा)ले संगठन निर्माण र विस्तार अभियान सञ्चालन गर्ने भएको छ । त्यसका लागि असारदेखि पुससम्मको समय तोकिएको छ ।

अध्यक्ष बाबुराम भट्टराईको संयोजकत्वमा केन्द्रीय अभियान परिचालन मूल समिति र सचिवालय निर्माण भएको छ ।

सचिवालयको संयोजकमा अध्यक्ष भट्टराई रहने तथा विशेष उपस्थिति अध्यक्ष महेन्द्र राय यादव र अभियानका सदस्यहरू गंगा श्रेष्ठ, हिसिला यमी, दुर्गा सोव, रमेश यादव, ईश्वर रिजाल, सिर्जना रिजाल, सोनामसिं स्याङतान, विश्वदीप पाण्डे र हरि रिजाल सचिवालय समिति सदस्य रहने बताइएको छ ।

यो समितिले संगठन निर्माण र विस्तारसम्बन्धी अभियानको सम्पूर्ण निर्णय र योजना गर्ने छ । गत असार १३ गते बसेको केन्द्रीय कार्य कारिणी समितिको बैठकले यस्तो निर्णय गरेको हो ।