काठमाडौं । नेकपा एमालेका अध्यक्ष केपी शर्मा ओलीले सरकार बनाउने र जोगाउने खिचलोमा अहिले एमाले नलाग्ने बताएका छन् । पार्टीको बागमति प्रदेश कमिटिको बैठकलाई मंगलबार सम्बोधन गदैं ओलीले एमाले आगामी चुनावमा एक्लै बहुमत ल्याएर कसैको टेको बिनै सरकार बनाउने गरि काममा लागिरहेको बताएका हुन् ।

‘अहिले हामी मिसन ०८४ र मिसन ५१ प्रतिशत जित निकालेर आफ्नै एकल सरकार बनाउनेतिर लागेका छौं’ अध्यक्ष ओलीले भने,-‘अहिले सरकार बनाउने, जोगाउने खिचलोमा लाग्ने फुर्सद हामीलाई छैन । हामीलाई यता र यताको टेको खोज्यो गर्नु अहिले छैन ।’

ओलीले अहिलेको सत्ता गठबन्धनले मात्रै जनताका बीचमा अफवाह मात्र फैलाउने काम गरिरहेको आरोप पनि लगाए । उनले सरकारले जनताको काम गर्न नसकेको तर जनतालाई अफवाह फैलाएर वेकुप भने बनाउन थालेको बताए । कांग्रेस, माओवादी लगायतको सत्ता गठबन्धन उस्तै उस्तै हरुका बीचको गठबन्धन भएकोले एमालेलाई यस्ता गठबन्धनहरुसित कुनै साइनो सम्वन्ध नरहेको पनि ओलीको भनाई थियो ।

ओलीले थप अगाडी भने,-‘अहिलेको सरकारको तागत झूट बोल्ने, अफवाह फैलाउने मात्रै हो । गठबन्धनका मान्छेहरुको त्यही देखिन्छ । त्यसैले उनीहरु यो गठबन्धन कायम राख्न चाहन्छन् अहिले उनीहरु उस्तैउस्ताहरु मिलेका छन् । हामीलाई सरकारमा जान हतारो नभएको होइन हामीले त्यता हेरेको पनि छैनौं । सोचेका पनि छैनौं ।’