काठमाडौँ । नेकपा एमालेले प्रधानन्यायाधीश चोलेन्द्र शमशेर राणा विरुद्ध सत्ता गठबन्धनले दर्ता गरेको महाभियोग प्रस्तावको प्रतिवाद गर्ने भएको छ । 

आज एमाले अध्यक्ष केपी शर्मा ओलीको निवास वालबोटमा बसेको  सचिवालय बैठकले महाभियोग लोकतन्त्रमाथि प्रहार र गणतन्त्रमाथि कमजोर बनाउने षड्यन्त्र भएको निष्कर्ष निकाल्दै यस्तो प्रवृतिको प्रतिवाद गर्ने निर्णय गरेको बैठकपछि महासचिव शंकर पोखरेलले जानकारी दिए ।

उनले सचिवालयको निर्णय अनुसार सोमबार बस्ने संसदीय दलको बैठकमार्फत थप निर्णय गरेर संसदीय अभ्यासमार्फत प्रतिवाद गर्ने बताए । आजै सत्तारुढ दल नेपाली कांग्रेस, नेकपा (माओवादी केन्द्र) र नेकपा (एकीकृत समाजवादी)ले २१ आरोप लगाउँदै  प्रधानन्यायधीश  राणालाई व्यवस्थापिका संसदको सचिवालयमा  महाभियोग प्रस्ताव दर्ता गरेको छ ।