काठमाडौं  । नेकपा एकीकृत समाजवादीका अध्यक्ष माधवकुमार नेपालले प्रतिनिधिसभा विघटन गरेर तीनै तहको निर्वाचनमा जानुपर्ने बताएका छन्।

संघीय संसद भवन नयाँ बानेश्वरमा पत्रकारसंगको कुराकानीमा उनले संसद विघटन गरेर अर्ली इलेक्सनमा जानुपर्ने बताएका हुन् । उनले संसद विघटन गर्ने र तीनै तहको निर्वाचन एक साथ गर्नेबारेमा छलफल समेत भइरहेको बताए ।   

‘हाउस चल्न पनि नदिने, केही गतिविधि गर्न नदिने, हामीलाई पनि हैरान पार्ने’ उनले भने ‘संसद नै सब भंग गरिदिने, न संसद रहन्छ न हंगामा गर्ने ठाउँ नै रहन्छ । चुनावमा जान्छ ।’

२३ भदौदेखि नेकपा एमालेले संसद बैठकमा निरन्तर अवरोध गर्दै आएको छ । माधव नेपालसहितका १४ सांसदलाई पार्टीले निष्कासनको कारबाही गरेर संसदलाई जानकारी गराउँदा सभामुख अग्निप्रसाद सापकोटाले सूचना टाँस नगरेको विषय उठाएर एमालेले संसद अवरोध गरिरहेको छ ।

केही दिनअघि सत्तारुढ गठबन्धनको बैठकमा पनि संसद विघटन गरेर अर्लि इलेक्सनमा जाने विषयमा छलफल भएको थियो ।