काठमाडौं । नेपाली चलचित्रकी अभिनेत्र करिष्मा मानन्धर नेकपा (एमाले)मा प्रवेश गर्ने भनेपछि कार्यक्रमस्थल कार्की पार्टी प्यालेसमा मानिसहरुको चहलपहल अरु दिनभन्दा फरक थियो ।

चर्चित नायिका नै एमालेमा प्रवेश गर्ने भनेपछि उनको आवगमन कस्तो हुने कसरी भाषण गर्लिन भनेर नेता तथा कार्यकर्तामा कौतुहल  रहेको थियो । पार्टी प्रवेश गर्दा उनी रातो साडीमा उपस्थित भएकी थिइन ।

उनीसंगै पुराना कम्युनिष्ट नेता तथा समाजवादी जनता पार्टीका अध्यक्ष प्रेमवहादुर सिंह प्रवेश गरे पनि आकर्षणको केन्दविन्दु भने करिष्मा नै रहेकी थिइन । निर्धारित समयमा नै कार्यक्रम स्थल पुगेकी करिष्मा एमालेका अध्यक्ष केपी शर्मा ओली नआएपछि उनी एक हलमा बसेकी थिइन ।

उनी बसेको कोठमा पत्रकारदेखि एमाले नेता तथा कार्यकर्ताको उनलाई हेर्नमा भीड नै लागेको थियो । उनीसंग फोटो खिचाउन पनि धेरै नै थिए । 
पार्टी प्रवेश गर्दा अध्यक्ष ओलीले खादा र महासचिव शंकर पोखरेल टीका लगाइदिएका थिए ।

उनले भाषणका क्रममा एमाले अध्यक्ष ओलीसंग प्रभावित भएर नै पार्टी प्रवेश गरेको बताइन् । उनले एमालेले मुलुकको परिवर्तन र समृद्धिको एजेन्डा बोकेको पार्टी भएको र आफू देशको विभिन्न भागमा पुग्दा एमाले नै मुलुक हाँक्ने पार्टी पाएको बताइन । 

यस्तै सिंहले आफू पुरानै घरमा फर्किको बताए । उनले एमालेबाट अलग भएपनि आफूले एमालेलाई क्षति पुर्‍याउने काम नगरेको बताए ।