काठमाडौं ।  नेकपा एमालेका अध्यक्ष केपी शर्मा ओलीले प्रधानमन्त्री शेरबहादुर देउवाको भारत भ्रमणलाई लिएर प्रश्न गरेका छन् ।

आज अनेरास्ववियुको विस्तारित बैठकलाई सम्बोधन गर्दै अध्यक्ष ओलीले चुनावका बेला प्रधानमन्त्री किन विदेश भ्रमणमा गएको भनेर प्रश्न गरे । अध्यक्ष ओली भने, ‘प्रधानमन्त्री देउवाजी भारत भ्रमण जानुभएछ, ठ्याक्कै चुनाव अगाडि किन जानुभएछ ? यतिबेलै किन जानुभयो ?’

अध्यक्ष ओलीले माओवादी केन्द्रका अध्यक्ष प्रचण्ड र नेकपा एकीकृत समाजवादीका अध्यक्ष माधव नेपाललाई ऐंजेरुको संज्ञा पनि दिएका छन। उनले विद्यार्थीहरुको मुल संगठन अनेरास्ववियू रहेको बताए ।

उनले एमालेलाई पहिला माधव नेपालहरुले हार्ने बानी लगाएको भन्दै आफुले जित्ने एमाले बनाएर युवाहरुलाई हस्तान्तरण गर्ने पनि बताए । आफुले पहिला पनि माओवादीको गलत नीतिको विरोध गरेको भन्दै उनले प्रचण्डपथ भनेको के रहेछ ? भन्दै प्रश्न गरे । उनले एमालेले सामाजिक जागरणका रुपमा वैज्ञानिक चेत फैलाउने दावी समेत गरे । 

अध्यक्ष ओलीले आगामी निर्वाचनमा पाँच दलीय गठबन्धन हराएर जाने भन्दै एमाले क्विन्टलको ढक र पाँच दल ५ किलोको ढक भएको पनि बताए ।