काठमाडौं । सत्तारुढ पाँच दलले  आगामी वैशाख ३० गते हुने स्थानीय तह निर्वाचनमा वडादेखि नै तालमेल गर्ने निर्णय गरेको छ ।  आज बालुवाटारमा बसेको सत्तारुढ गठबन्धनले तालमेलको आधार समेत पारेको छ । 

गठबन्धनले महानगर र उपमहानगरपालिका मेयर तथा उपमेयरको सिट बाँडफाँडको निर्णय पाँच दलीय गठबन्धनेको केन्द्रीय संयन्त्रले गर्ने निर्णय गरेको संचारमन्त्री ज्ञानेन्द्रवहादुर कार्कीले जानकारी दिए ।

गठबन्धनले बैशाख ५ गतेभित्र जिल्लास्तरमा गठबन्धनको खाँका सहितको निर्णय केन्द्रमा पठाउन निर्देशन दिएको छ । 

बैठकले  नगर र गाउँपालिकाको तालमेलको सिट बाँडफाँट वैशाख ३ गतेभित्र जिल्ला संयन्त्रले प्रदेशलाई र प्रदेश संयन्त्रले निर्णय गरि वैशाख ५ गतेभित्र केन्द्रलाई पठाउने निर्देशन दिएको छ । 

यस्तै सबै पालिकाका वडाध्यक्ष र सदस्यहरूको सिट बाँडफाँटको जिल्ला संयन्त्रले वैशाख ३ गतेभित्र टुंगो लगाउने निर्णय गरेको छ । 

सिट वाँडफाँड प्रदेश तथा जिल्ला संयन्त्रमा प्रत्येक दलको प्रमुख सहित दुई दुई जना प्रतिनिधि रहने व्यवस्था गरेको छ ।

यसैगरी प्रत्येक तहको दलीय संयन्त्रमा निर्णय लिन आ आफ्नो आवश्यकता अनुसार प्रतिनिधि आमन्त्रण गर्न सकिने, सबै तहको बैठकको संयोजन नेपाली कांग्रेसका सम्बन्धित तहका सभापतिले गर्ने छन् । 

यसैगरी गठबन्धनले २०७४ को स्थानीय तहको निर्वाचनमा प्रमुख पदमा विजयी नेकपा एकीकृत समाजवादीमा कायम रहेका जनप्रतिनिधिलाई त्यसै अनुसार मान्ने भएको संचारमन्त्री कार्कीले बताए ।

गठबन्धनमा आबद्ध दलका उम्मेदवारले पालिका र वडामा प्राप्त मतको मत भार मान्ने, २०७४ स्थानीय निर्वाचनमा विजय प्राप्त नगरेको भए पनि स्थानीय तहमा उपस्थित रहेका दललाई पनि तालमेलमा सहभागी गराउने निर्णय समेत गरेको छ । 

उनका अनुसार गठबन्धनले दलले  २०७४ को निर्वाचनमा गठबन्धन बाहेकका दल विजयी स्थानमा प्रमुख पदमा प्राप्त मतलाई आधार बनाउने र अन्य दलका उम्मेदवारले पाएको मत भरलाई पनि आधार मान्ने भएको छ । 

सत्तारुढ दलले गठबन्धनभित्र मात्र चुनावी तालमेल गर्ने, गठबन्धनबाहिर चुनावी तालमेल गर्न नपाइने निर्णय गरेको छ । पाँच दलले गठबन्धन गरे एमालेलाई स्थानीय तहको निर्वाचनमा जित्न सकस हुने बताइएको छ । एमाले पनि साना दल राप्रपा, लोकतान्त्रिक समाजवादी लगायत दलसंग गठबन्धन गर्ने तयारी गरेको छ ।