काठमाडौं । सत्तारुढ गठबन्धनले आगामी वैशाख ३० गते हुने स्थानीय तहको निर्वाचनमा महानगर र उपमहानगरमा भागबन्डा गरेका छन् । 

लामो छलफल र रस्साकस्सीका वीच सत्ता गठबन्धनका ५ दलले महानगर र उपमहानगरको सिट बाँडफाँडको भागवन्डा मिलाएका हुन। आज दिउँसो सत्तारुढ गठबन्धनको बसेको बैठकले भागबन्डा टुंगो  लगाएको हो । 

सहमित अनुसार कांग्रेसले ३ महानगर र ७ उपमहानगरपालिकाको नेतृत्व पाउने भएको छ ।

कांग्रेसको भागमा काठमाडौं, ललितपुर र विराटनगर महानगरपालिको मेयर परेका छन् । त्यस्तै धरान, इटहरी, कलैया, बुटवल, तुलसीपुर, नेपालगञ्ज र धनगढीको मेयर कांग्रेसले पाएको छ ।
त्यस्तै नेकपा माओवादी केन्द्रले भरतपुर महानगरपालिका तथा जितपुर सिमरा र घोराही उपमहानगरपालिकाको  प्रमुख  पाउने भएको छ ।

नेकपा (एकिकृत समाजवादी)ले  पोखरा महानगरपालिका र हेटौंडा उपमहानगरपालिकाको प्रमुख पाउँदा जनता समाजवादी पार्टीले वीरगञ्ज महानगरपालिका र जनकपुर उपमहानगरपालिकाको प्रमुख पाएको छ ।

महानगरमध्ये कांग्रेसले वीरगञ्ज, भरतपुर र पोखरामा उपप्रमुख पाउने भएको छ । त्यस्तै जितपुर सिमरा, घोराही र हेटौंडा उपमहानगरपालिकामा कांग्रेसले उपप्रमुख पाउने सहमति बनेको छ ।

यस्तै माओवादीले ललितपुर महानगरको उपप्रमुख पाउने भएको छ । धरान र धनगढी उपमहानगरमा माओवादीले उपप्रमुख पाउने सहमति गठबन्धनमा बनेको छ । एकीकृत समाजवादीले काठमाडौं महानगरपालिका, इटहरी उपमहानगरपालिका, बुटवल उपमहानगरपालिका र तुलसीपुर उपमहानगरपालिकामा उपप्रमुख लिने सहमति भएको छ ।

जसपाले विराटनगर महानगरपालिका, कलैया उपमहानगरपालिका र नेपालगञ्ज उपमहानगरपालिकामा उपप्रमुख पाउने भएको छ ।