काठमाडौं । नेकपा एकीकृत समाजवादीका अध्यक्ष माधवकुमार नेपालले मन्त्रिपरिषद् हेरफेर नियमित प्रक्रिया भएको बताएका छन् । निर्णयबारे पत्रकारहरूलाई संक्षिप्त प्रतिक्रिया दिँदै अध्यक्ष नेपालले मन्त्री बनाउने बेलामै ६ महिनाका लागि भन्ने तय गरिएको बताए ।

‘उहाँहरूलाई बनाउँदै ६ महिनाका लागि भनेका थियौं । यो नियमित प्रक्रिया हो’, नेपालले भने । पार्टी अध्यक्ष  नेपाल प्रधानमन्त्री शेरवहादुर देउवालाई नयाँ मन्त्रीको नाम बुझाएका हुन् । 

नयाँ मन्त्रीहरुमा पर्यटनमा जीवनराम श्रेष्ठ, शहरीमा मेटमणि चौधरी, श्रममा शेरबहादुर कुँबर र स्वास्थ्यराज्यमन्त्रीमा हिरा केसी रहेका छन् । अहिलेका स्वास्थ्यराज्यमन्त्री भवानी  खापुङलाई भने स्वास्थ्य मन्त्रीका रुपमा बढुवा गरिने छ । 

एकीकृत समाजवादीले अहिलेका मन्त्रीलाई छ महिना मन्त्री बनाउने सहमति गरेको र ति मन्त्रीको कार्यशैली सन्तोषजनक नभएर नयाँ मन्त्री पठाएको हो । 

देउवा मन्त्रिपरिषदमा समाजवादीबाट स्वास्थ्यमन्त्री विरोध खतिवडा, शहरी विकासमन्त्री रामकुमारी झाँक्री, पर्यटनमन्त्री प्रेम आले र श्रममन्त्री किसान श्रेष्ठ तथा खापुङ स्वास्थ्य राज्यमन्त्री रहेका छन् ।