अछामको पञ्चदेवल विनायक नगरपालिका–४ का १५ वर्षिय बालक विनोद शाहीको हत्यामा संलग्नलाई कारबाहीको माग गर्दै सांसद यज्ञ बहादुर बोगटीले डिएसपी रवि थपलिया र सिडियो विश्वराज मराशैनीको निलम्बन माग गरेका छन् । 

बोगटीले आज प्रतिनिधिसभा बैठकमा बोल्दै अछामको पञ्चदेवल विनायक नगरपालिका–४ मा बैशाख ३० गतेदेखि प्रहरी प्रशासनको आतंक पटकपटक भइरहेको बताए। उनले भने 'डिएसपी रवि थपलिया र सिडियो विश्वराज मराशैनीको नेतृत्वमा एमालेका नेता कार्यकर्ता खोजीखोजी तर्साउने र धम्काउने तथा महिलामाथि ज्याददी र बालबालिकालाई पनि हातपात गरिएको छ'। बोगटीले यो कार्य निन्दनीय भएको भन्दै यस घटनामा संलग्न प्रहरी र सिडियोलाई तत्काल निलम्बन गर्न पनि माग गरेका छन । 

'प्रहरीको घेरामा रहेको गाउँबाट १५ बर्षिय बालक विनोद शाही गायव हुन्छन  र उनको हत्या गरिएर शव भेट्टिन्छ तर अहिलेसम्म पनि त्यस घटनामा प्रहरीले जाहेर समेत लिन मानेको छैन । डिएसपी र सिडियोको निलम्बनका लागि सभामुख मार्फत सरकारसँग जोडदार माग गर्न चाहान्छु' बैठकमा बोगटीले भने ।