नेकपा एकीकृत समाजवादी निकट अनेरास्ववियूले ३२ वर्षको उमेरहदबन्दी र पदाधिकारी रहन कम्तिमा स्नातक पूरा गरेको शैक्षिक योग्यता कायम गर्न माग गरेको छ।

पार्टी अध्यक्ष माधवकुमार नेपाललगायत पार्टीका पदाधिकारीलाई भेटी उमेर हदबन्दी घटाउन माग गरिएको विद्यार्थी संगठनका स्थायी समिति सदस्य टिकाराम भण्डारीले जानकारी दिए। यस्तै, अनेरास्ववियूको तत्काल पुनर्गठनको माग गरेको छ। उपरोक्त उमेर र शिक्षाको हदबन्दीले नेतृत्वबाट बिदा लिने सम्पूर्ण सदस्यलाई पार्टीको महत्वपूर्ण जिम्मेवारी प्रदान गर्न पनि माग गरेको छ।

पार्टी अध्यक्षलाई बुझाइएको ध्यानाकर्षणपत्रमा भनिएको छ, 'अब देश निर्माणको चरणमा प्रवेश गरेकोले कसरी देशको विकास र बेरोजगारीको अन्त्य हुन्छ? भन्ने विषयमा विश्वविद्यालय र क्याम्पसहरुमा व्यापक विमर्श गर्न जरुरी छ। आज विद्यार्थी आन्दोलनको सान्दर्भिकता सकियो कि भन्ने आवाज कतै कतै सुनिन्छ तर देश निर्माणको यो चरणमा अझ टड्कारो रुपमा विद्यार्थी आन्दोलनको आवश्यकता महसुस भएको छ।’

विद्यार्थी आन्दोलनभित्र वैचारिक, सांगठनिक र कार्यशैलीगत समस्या देखिएको भन्दै अनेरास्ववियुले यो विद्यार्थी संगठनलाई क्रान्तिकारी, चलायमान बनाउन नयाँ ढंगबाट अघि बढाउनुपर्ने बताएको छ।