काठमाडौँ । उपप्रधान तथा भौतिक पूर्वाधारमन्त्री नारायणकाजी श्रेष्ठले भौतिक पूर्वाधार तथा यातायात मन्त्रालय सामाजिक न्यायसहितको समृद्धि हासिल गर्ने राष्ट्रिय संकल्पको एउटा प्रमुख बाहक भएको बताएका छन् ।

आफ्नो कामबारे पत्रकार सम्मेलन गर्दै उनले राष्ट्र निर्माणको अभिभारा पूरा गर्न इमानदारीपूर्वक अगाडि बढ्नु पर्ने बताए ।

उनले भने, ‘सरकारको प्राथमिकतालाई महत्वका साथ लागू गराउन सिंगो मन्त्रालयले आत्मसात गरेको अनुभूति गरेको छु, यसका बाबजुद देखापर्ने कैयौं चुनौतीलाई परास्त गर्न सिंगो मन्त्रालय उत्तिकै कटिबद्ध रहेको विश्वास लिएको छु ।’

उनले यातायात व्यवस्थामा कार्यगत, प्रणालीगत सुधार गर्ने काम थालनी भइसकेको बताउँदै लाइसेन्स छपाइलगायतका परम्परागत समस्या समाधान हुन केही समय लाग्ने बताए ।

मन्त्री श्रेष्ठलाई सरकारको पुनर्गठन हुँदा गृह मन्त्रालयमा सार्ने प्रधानमन्त्रीको तयारी भएसँगै उनले भौतिक मन्त्रालयमा नियुक्त भएपछि आफूले गरेको काम आज सार्वजनिक गरेका हुन् ।