काठमाडौं । प्रतिनिधिसभाको बैठकमा प्रधानमन्त्री केपी ओलीले सम्बोधन गर्ने भएका छन् । शनिबार छिमेकी मुलुक चीन भ्रमणमा जान लागेका ओलीले भ्रमणमा आफूले गर्ने कार्यको जानकारी दिन शुक्रबार बस्ने प्रतिनिधिसभा बैठकमा सम्बोधन गर्न लागेका छन् । सरकारका प्रवक्ता सञ्चारमन्त्री पृथ्वीसुब्बा गुरुङले नेपालको भूमि लिपुलेक हुँदै दुईदेशीय व्यापार अघि बढाउनेबारे भारत र चीनबीच गत भदौ ३ गते सहमति भएको विषयमा प्रधानमन्त्री ओलीले चीन भ्रमणका बेला कुरा उठाउने बताएका छन् । प्रधानमन्त्री ओलीले संसदमा गर्ने सम्बोधनमा पनि यसबारे प्रष्ट पार्ने बुझिएको छ । प्रधानमन्त्री ओली भदौ १४ गते चीन भ्रमणमा गएर भदौ १८ गते स्वदेश फर्किने कार्यक्रम छ । सभामुख देवराज घिमिरेले शुक्रबार बस्ने संसद बैठकको कार्यसूची र भदौ १५ गतेपछिको कार्यतालिकाबारे छलफल गर्नका लागि संसदमा रहेका पाँच दलका प्रमुख सचेतकसँग छलफल गरेका थिए । प्रधानमन्त्रीले पनि सम्बोधन गर्ने विषयमा सरकारबाट जानकारी आएको छलफलमा सभामुखले जानकारी गराएका थिए । कांग्रेस प्रमुख सचेतक श्यामकुमार घिमिरेले पनि शुक्रबार प्रधानमन्त्रीले सदनमा सम्बोधन गर्ने जानकारी दिए । शुक्रबार पछि भदौ १८ ,२५,२६ र २७ गते प्रतिनिधि सभा बैठक बस्ने गरी कार्यतालिका बनाउने सहमति भएको छ ।