काठमाडौँ, । स्वास्थ्य तथा जनसङ्ख्या मन्त्रालयले नेपालमा मौसमी रुघाखोकीका कारणले कोरोना भाइरस सङ्क्रमण बढिरहेको जनाएको छ । 

मन्त्रालयका सहप्रवक्ता डा. समिरकुमार अधिकारीले आज विज्ञप्ति जारी गर्दै छिमेकी मुलुकमा कोरोना भाइरसको नयाँ भेरियन्ट ओमिक्रोन एक्सविवि १.१६ देखिएकोले नेपालमा सङ्क्रमण बढिरहेको जनाएका छन् । 

उनले सङ्क्रमण बढिरहेकोले रोकथाम र नियन्त्रणका लागि सवै तह र तत्काबाट प्रभावकारी भूमिका निभाउन समेत आग्रह गरेका छन् । 

उनले रोकथाम र नियन्त्रणकालागि जनस्वास्थ्यका मापदण्डको पालना गर्न र गराउन सवै सरोकारवाला निकायलाई आग्रह गरे । उनका अनुसार यहि चैत महिनामा २४ वटा नमूना परीक्षण गरिएकोमा २४ वटैमा ओमिक्रोन भेरियन्ट पुष्टि भएको छ । 

मन्त्रालयका अनुसार कोभिड–१९ मा हुने अणुवांशिक परिवर्तनको पहिचान राष्ट्रिय जनस्वास्थ्य प्रयोगशालामा गरिएको हो ।  

जसअनुसार ओमिक्रोन विए १.१ दुई वटा, ओमिक्रोन विए २ दुई वटा, ओमिक्रोन विए २.७६ एक वटा, ओमिक्रोन विए ५ दुई वटा भेरियन्ट फेला परेका छन् । 

यस्तै ओमिक्रोन विए ५.२ दुई वटा, ओमिक्रोन एक्सविवि १.१६ दशवटा, ओमिक्रोन एक्सविवि १.५  तीन वटा, ओमिक्रोन एक्सविवि २.६ एक वटा र ओमिक्रोन एक्सविएफ एक वटा फेला परेका छन । 

 “कोभिड–१९ महामारी अझ पनि पूर्ण रुपमा नियन्त्रणमा आइसकेको छैन ।  खोप, जनस्वास्थ्यका मापदण्ड लगायतका बहुक्षेत्रिय संयन्त्रको सयुक्त सहकार्यबाट यसको रोकथाम, नियन्त्रण तथा उपचारले जटिलता हुनबाट जोगाउने अवस्था रहेको छ” मन्त्रालयका सहप्रवक्ता डा. अधिकारीले जारी गरेका विज्ञप्तिमा उल्लेख गरिएको छ । 

हिजो कोरोना भाइरसको सङ्क्रमण ७६ जनामा देखिएको छ ।