काठमाडौं । नेपाल स्टक एक्सचेन्ज (नेप्से) मा साताको पहिलो कारोबार दिन हरियाली छाएको छ । आइतबार सेयर बजार ४०.४८ अंकले वृद्धि भएको छ ।

नेपाल स्टक एक्सचेन्जका अनुसार आइतबार सेयर बजार बढेर १९८०.९० विन्दुमा पुगेको छ । आज ९५ लाख २८ हजार कित्ता सेयर किनबेच हुँदा तीन अर्ब ४५ करोड रुपैयाँको कारोबार भएको छ । जुन यो केही महिनायताकै उच्च अंकको कारोबार रकम हो ।

आइतबार सबैभन्दा बढी नागरिक लगानी कोषको ११ करोड १४ लाख रुपैयाँको सेयर किनबेच भएको छ । आज दुई कम्पनीको सेयरमा सकारात्मक सर्किट लागेको छ । सकारात्मक सर्किट लाग्नेमा भुगोल इनर्जी डेभलपमेन्ट कम्पनी र सिटी होटल्स छन् । १८ सयको विन्दुमा झरेको नेप्से एक सातामै डेढ सयभन्दा बढी अंकले वृद्धि भएको छ । कारोबार रकम पनि बढिरहेको छ ।