काठमाडौँ । भारतमा एकै दिन डेढ लाख भन्दा धेरैमा कोरोना भाइरसको संक्रमण देखिएको छ । भारतको केन्द्रीय स्वास्थ्य मन्त्रालयले पछिल्लो २४ घण्टामा १ लाख ५९ हजार ६३२ जनामा संक्रमण पुष्टि भएको आइतबार जानकारी दिएको हो । 

कोभिडको नयाँ भेरियन्ट ओमिक्रोन देखिएसँगै भारतमा संक्रमितको संख्या दिनहुँ उकालो लागिरहेको छ । अघिल्लो दिन भारतमा १ लाख ४१ हजार जनामा संक्रमण पुष्टि भएको  थियो । 

पछिल्लो २४ घण्टाको अवधिमा ४० हजार ८६३ जना संक्रमणमुक्त भएका छन् भने ३२७ भारतीयले कोरोनाबाट ज्यान गुमाएका छन् । भारतमा कोरोनाका कारण अहिलेसम्म ४ लाख ८३ हजार ७ सय भन्दा धेरैले ज्यान गुमाएका छन् ।

अहिले भारतमा झण्डै ६ लाख सक्रिय कोरोना संक्रमित छन् ।

पछिल्लो समय भारतमा संक्रमितको संख्या निरन्तर बढ्न थालेपछि खुला सीमा रहेको नेपाल पनि उच्च जोखिममा परेको छ । नेपालमा पनि संक्रमितको संख्या ह्वात्तै बढिरहेको छ । शनिबार नेपालमा ९४४ जनामा संक्रमण पुष्टि भएको थियो । नेपालमा पनि दैनिक संक्रमित बढिरहेका छन् ।