काठमाडौं । काठमाडौँ महानगरपालिकाले कक्षा ११ को छात्रवृत्तिका लागि अनलाइन आवेदन आह्वान गरेको ८ दिनमा १ हजार ८३ जनाको दरखास्त परेको छ ।

महानगरले असार २८ गते विहान १० बजेबाट अनलाइन फाराम खोलेको थियो । उक्त समयदेखि साउन ४ गते अपराह्न साढे ३ बजेसम्म छात्रवृत्तिका लागि १ हजार ८३ जनाले फाराम भरेको महानगरपालिकाले जानकारी दिएको छ ।

महानगरका अनुसार सबैभन्दा धेरै आवेदक विज्ञान संकायका छन् । जसमध्ये ५४९ जना छात्र र २२७ जना छात्रा हुन् । यस्तै दोस्रोमा व्यवस्थापन संकायका लागि २३९ जना छन् । यस संकायतर्फ छात्रको संख्या १४८ र छात्राको संख्या ९१ छ ।

यस्तै प्राविधिक विषयका लागि २४ जना छात्र र १७ जना छात्रा गरी ४१ जना, कानुनतर्फ १६ जना छात्रा र ७ जना छात्र गरी २३ जना, मानविकीमा १ जना छात्र र १ जना छात्रा एवं शिक्षामा १ जना छात्र र १ जना छात्राको आवेदन परेको छ ।