काठमाडौं । सुन तस्करी र हुण्डीसँग जोडिएको २५ करोडका मालिकलाई छाडेर ट्रक चालकलाई भने थुनामा पठाइएको छ । गत ४ चैतमा टोखाबाट २५ करोडभन्दा बढी रकमसहित पक्राउ परेका भरिया कारागार चलान हुँदा असार ३२ गते त्यसका मालिक नारायण पौडेल भने सुटुक्क रिहा भएका छन् । उनलाई काठमाडौै जिल्ला अदालतले ३५ लाख धरौटी लिएको पाइएको छ । यसरी हेर्नै हो भने अदालतले मालिकलाई रिहा गर्न आदेश दिएर भरियालार्य कारागार पठाएको देखिन्छ । ट्रकमा फल्स बटम बनाएर लुकाएर राखेको अवस्थामा यूरो र डलर गरी २५ करोडभन्दा बढी रकमसहित पक्राउ परेका भरिया (ट्रक चालक) फुच्चे भनिने कुसाङ लामा पुर्पक्षका लागि कारागार चलान भएका थिए ।
पैसा बरामद हुँदा फरार रहेका २५ करोडका मालिक सिन्धुपाल्चोक भोटेकोशी गाउँपालिका–४ का ३५ वर्षीय नारायण पौडेल सुटुक्क अदालत उपस्थित भएर रिहा भएका थिए । काठमाडौं जिल्ला अदालतका न्यायाधीश कृष्णप्रसाद शर्मा नेपालको ३२ असारको इजलासले पौडेललाई धरौटीमा रिहा गर्ने आदेश दिएको थियो । यसअघि ३ वैशाखमा न्यायाधीश ठाकुरप्रसाद खरेलको इजलासले भरिया सिन्धुपाल्चोकको भोटेकोशी गाउँपालिका–१ का लामालाई पुर्पक्षका लागि कारागार चलानको आदेश दिएपनि मालिक भने छुटेका छन् । 
ट्रक चालक लामाले पैसा बरामद हुनुअघि पौडेलसँग लामो फोन सम्पर्क गरेका थिए । त्यसको प्रमाण पनि अदालतमा पेश भएको थियो । स्रोतका अनुसार उनीहरुको बीचमा सयौं पटक फोनमा सम्पर्क भएको थियो । लामाले पौडेलले प्रयोग गर्ने मोबाइलमा २८ पटक सम्पर्क भएको देखिन्छ । कल डिटेल प्रतिवेदनमा त्यसपछि न्यौपानेले सोही रात टोखा बालकुमारी मन्दिरबाट मोबाइल बन्द गरेको देखिएको छ । लगत्तै लामा र पौडेलका ड्राइभर हरिबहादुर भण्डारीसँग १६९ पटक फोन सम्पर्क भएको देखिएको छ । तर लामाले पौडेललाई फोन गर्नुको कारणबारे बाटोमा गाडीमा खराबी आएको कारणले कुराकानी भएको बताएका छन् । 
लामाले सो दिन आफ्ना दाइ ग्याम्जो शेर्पासँग १३९ पटक, भाउजु दिवाङ शेर्पासँग १६ र श्रीमती दामु शेर्पासँग ७४ पटक फोन सम्पर्क गरेको अदालतमा प्रस्तुत भएको कल डिटेल प्रतिवेदनमा छ । यता पौडेलले आफ्नो ड्राइभर हरिबहादुर भण्डारीसँग २६७ पटक फोन सम्पर्क गरेका छन् । सगुन केसीसँग ७३ पटक, छोरा दीपेश पौडेलको मोबाइलमा २१३ पटक, भाइ राजकुमार पौडेलकहाँ काम गर्ने सरोज कोइरालाको मोबाइलमा २० पटक फोन गरेका छन् । यसरी पौडेललाई कसुर देखाउने धेरै आधार भएपनि न्यायलयले छाडिदिएको प्रहरीका एक अनुसन्धान अधिकृतले भने ।