काठमाडौं ।सर्वोच्च अदालतले गौर हत्याकाण्डलाई १९ वर्षपछि अनुसन्धान गर्ने आदेश दिएपछि रौतहटमा राजनीतिक हलचल मच्चिएको छ । २०६३ चैत ७ गते रौतहट सदरमुकाम गौरस्थित राइस मिल फिल्डमा २७ जनाको सामूहिक हत्याकाण्डको विषयमा छानबिन गर्न सर्वोच्च अदालतले सोमवार परमादेश दिएपछि रौतहटमा राजनीतिक हलचल मच्चिएको हो । 
घटनामा मुख्य गरी तत्कालीन मधेशी जनअधिकार फोरमका नेता तथा कार्यकर्ताहरु सम्मिलित भएको कारण स्थानीय राजनीतिमा निकै चासो बढेको छ । तत्कालीन अवस्थामा मधेशवादी दलमा रहेका विभिन्न नेताहरु अहिले नेकपा एमाले, नेपाली काँग्रेस, जनता समाजवादी पार्टी (जसपा), नेकपा एस तथा अन्य दलमा रहेका छन् ।
तत्कालीन चर्चित मधेशवादी नेता तथा पूर्व साँसद बबन सिंहले सर्वोच्चले गरेको परमादेश विदेशीको इसारामा भएको आरोप लगाएका छन् । हाल नेकपा एमालेमा रहेको सिंहले विदेशीहरुले देशमा उथलपुथल गर्न चाहेको आरोप लगाउँदै देशको कूटनीति नै विदेशीको हातमा रहेको गम्भीर आरोप लगाएका छन् । देशलाई आर्थिक रुपमा पनि कमजोर बनाउने विदेशीहरुले गरेको षड्यन्त्रको रुपमा सर्वोच्चको परमादेशलाई व्याख्या गर्दै सिंहले यस विरुद्ध आन्दोलन गर्नुपर्ने बताएका छन् । मुद्दामा सिंह पनि आरोपित रहेका छन् । 
यसै गरी एमाले नेता तथा गौर नगरपालिकाका पूर्व नगरप्रमुख अजय गुप्ताले सर्वोच्च अदालतले दिएको परमादेशको सम्मान गर्नुपर्ने बताएका छन् । छानबिनमा आफ्नो नाम रहेको भए पनि आफू विचलित नभएको बताउँदै गुप्ताले गौर हत्याकाण्डलाई राजनीतिक घटना भएको र यसलाई राजनीतिक मुद्दाको रुपमा लिनुपर्ने बताएका छन् ।
मुद्दामा नाम रहेका पूर्व प्रदेश साँसद तथा पूर्व नगर प्रमुख बाबुलाल साहले घटनाको समयमा आफू नेपालमा नभई मुम्बईमा रहेको बताउँदै राजनैतिक प्रतिशोधको कारण नाम हालेको बताएका छन् । घटनाको बारेमा पहिले राष्ट्रिय मानव अधिकार आयोगको अनुसन्धानको रिपोर्टको आधारमा सर्वोच्चले अगाडि बढ्नुपर्ने सुझाव दिएका छन् । राजनीतिक मुद्दा भएकोले त्यसै आधारमा यसलाई लिनुपर्ने साहको भनाइ छ ।
जसपाका कार्यकारिणी सदस्य तथा पूर्व प्रदेश सभा साँसद रामकिशोर यादवले सर्वोच्चको परमादेशलाई गलत र धाधली भएको तथा हत्या हिंसाको मुद्दा नभई जबरजस्ती मुद्दा भएको बताएका छन् । यादवले सर्वोच्चको परमादेश नै गलत भएको आरोप लगाउँदै परमादेश विरुद्ध सल्लाह गरी आन्दोलन गर्नुपरे पनि आन्दोलन गर्ने बताएका छन् । यादवले आफू परमादेशप्रति असन्तुष्ट रहेको बताएका छन् । 
जसपाका केन्द्रीय सदस्य तथा पूर्व प्रदेश राज्यमन्त्री योगेन्द्र यादवले सर्वोच्चको परमादेशप्रति आफू केही बोल्न नसक्ने बताएका छन् ।
रौतहटका अधिकांश नेताहरुको नाम मुद्दाको अनुसन्धानमा जोडिएकाले रौतहटमा पूर्णतः राजनीतिक हलचलको रुपमा रहेको देखिएको छ ।   
गत २०८० जेठ १८ गते गौर हत्याकाण्डको छानबिन हुनुपर्ने भन्दै त्रिभुवन साह, रुपसागर उपाध्याय, रोकाया खातुन, विक्रम पटेल र रामशरण यादवले सर्वोच्चमा निवेदन दिएका थिए । 
निवेदक रुपसागर उपाध्यायका पति नर्मदेश्वर उपाध्याय, रोकाया खातुनकी छोरी प्रतिमा खातुन, बिक्रम पटेलका भाइ राज पटेल र रामसरण यादव छोरा रामबाबु यादवको उक्त घटनामा मृत्यु भएको थियो । 
निवेदक उपाध्याय खुसी
सर्वोच्च अदालतमा गौर हत्याकाण्डको छानबिन हुनुपर्ने भनी निवेदन दिने रुपसागर उपाध्याय सर्वोच्चको परमादेशपछि खुसी भएको बताएकी छन् । उपाध्यायले घटनामा निर्दोष पति मारिएको भन्दै सर्वोच्चको परमादेशले न्याय पाउने आशा पलाएको बताएकी छन् । 
उपाध्याय न्याय पाउनको लागि जिल्ला अदालत, उच्च अदालत, गृह मन्त्रालय, प्रधानमन्त्रीको कार्यालय तथा न्याय पाउने आशामा अन्य विभिन्न निकायमा धाएको र ठुलो संघर्ष गरेको बताउँदै अन्ततः सर्वोच्च अदालतले छानबिन गर्ने आदेश दिएपछि खुसी लागेको बताएकी हुन् । 
१९ बर्षपछि अनुसन्धान गर्न परमादेश
झण्डै दुई दशकदेखि न्यायको पर्खाइमा रहेको बहुचर्चित गौर हत्याकाण्डको अनुसन्धान प्रक्रिया अघि बढाउन सर्वोच्च अदालतले परमादेश जारी गरेको छ ।
न्यायाधीशद्वय तिलप्रसाद श्रेष्ठ र नित्यानन्द पाण्डेयको संयुक्त इजलासले सोमबार रौतहटस्थित सरकारी वकिलको कार्यालय र जिल्ला प्रहरी कार्यालयका नाममा यो आदेश दिएको हो ।
पीडितहरुको तर्फबाट वरिष्ठ अधिवक्ता मुक्ति प्रधान, वरिष्ठ अधिवक्ता उद्धव चौलागाईँ, अधिवक्ता जयमंगल प्रसाद, अधिवक्ता कस्तुरी जयसवालसहित १६ जना कानुन व्यवसायीले सर्वोच्च अदालतमा बहस गरेका थिए ।
घटना विवरण
२०६३ चैत ७ गते रौतहटको गौरमा तत्कालीन नेकपा (माओवादी) र मधेशी जनअधिकार फोरमबीच भएको भिषण झडपमा २७ जना माओवादी कार्यकर्ताको ज्यान गएको थियो ।
रौतहट सदरमुकाम गौरस्थित राइस मिलको चौरमा तत्कालीन मधेशी जनअधिकार फोरम र नेकपा (माओवादी) ले एकै समय र स्थानमा सभा आयोजना गरेपछि दुई पक्षबीच झडप भएको थियो ।
उक्त झडप हिंसात्मक बन्दा २७ जना माओवादी कार्यकर्ताको निर्मम हत्या भएको थियो भने कैयौं घाइते भएका थिए । 
एउटै स्थानमा कार्यक्रम गर्ने दुवै दलले कार्यक्रम नगरी नछाड्ने हठले निम्त्याएको गौर नरसंहारमा माओवादीका २७ कार्यकर्ताको मृत्यु हुनुका साथै ४२ जना घाइते भए । 
जनसभाको नाम दिँदै २०६३ चैत ७ गते दिउसो माओबादी र फोरमले एकैस्थानमा एकै समयमा कार्यक्रम गर्न लाग्दा झडप भएको थियो । झडपमा मारिएका माओबादी माथि फोरम कार्यकर्ताले खुकुरी, गोली र लाठी, बासको फराठा प्रहार गरी निर्मम तरिकाले हत्या गराएको माओबादीले आरोप लगाउँदै आएको छ । दुबैतर्फ सभा हुन नपाउँदै झडप भएको थियो । फोरमले सभा सुरु गर्न आफ्ना नेता कार्यकर्तालाइ मञ्चमा बोलाईरहेको थियो । माओबादीका वाईसिएलहरु गौर बजार परिक्रमा गर्दै थिए । केही बेर पछि वाईसिएल मैदान प्रवेश ग¥र्यो । आफु तिरको मञ्च भत्किएको देखे पछि माओबादी आक्रामण शैलीमा प्रस्तुत भयो । र झडपको अवस्था सिर्जना भयो । दुबै तर्फबाट गोली हानाहान पछि झडप भयो । झडपको क्रममा ५ महिलासहित २७ माओबादीको मृत्यु भएको थियो ।