काठमाडौं । सरकारले आगामी स्थानीय  तह निर्वाचनका लागि म्यादी प्रहरीको भर्ना खुलाएको छ।

प्रहरी प्रधान कार्यालयले जारी गरेको सूचनाअनुसार एक लाख संख्यामा म्यादी प्रहरी भर्ना खुलाइएको हो। यही ६ चैतबाट २१ गतेसम्मको दरखास्त दिन सकिने कार्यालयले जनाएको छ।

महानगरीय प्रहरी परिसर काठमाडौं, ललितपुर र भक्तरपुर र जिल्लास्थित सबै प्रहरी कार्यालयमा भर्नाका लागि दरखास्त दिन पाइने जनाइएको छ।

म्यादी प्रहरी ४० दिनका लागि भर्ना गरिने छ । उक्त ४० दिन काम गरेवापत म्यादी  प्रहरीले  तलव र भत्ता गरी ४३ हजार ४४० रुपिया पाउने छन् ।

साथै निर्वाचनको क्रममा खट्नका लागि यातायात खर्च एक हजार रुपियाँ समेत दिइने सूचनामा उल्लेख गरिएको छ । स्थानीय तहको निर्वाचन एकै साथ आगामी बैशाख ३० गते हुँदै छ ।