काठमाडौँ, । कोरोना भाइरसको सङ्क्रमण आज ४५ जनालाई देखिएको छ ।

स्वास्थ्य तथा जनसङ्ख्या मन्त्रालयले आज सार्वजनिक गरेको वुलेटिनमा चार हजार ७५२ जनामा कोरोना परीक्षण गर्दा ४५ जनामा सङ्क्रमण देखिएको छ । 
मन्त्रालयका अनुसार सक्रिय सङ्क्रमितको सङ्ख्या तीन हजार  १३५ जना रहेका छन् ।

पछिल्लो समय १४७ जना कोरोनाबाट निको भएर घर फर्किएका छन् । योसँगै निको हुनेको सङ्ख्या नौ लाख ६३ हजार १११ पुगेको छ । निको हुने दर ९८.५ प्रतिशत रहेको मन्त्रालयले जनाएको छ ।
आज सङ्क्रमणबाट कसैको पनि निधन भएको छैन । 

मन्त्रालयका अनुसार २०० भन्दा बढी सङ्क्रमित भएका जिल्लामा ललितपुर, काठमाडौँ, चितवन र बाँके रहेका छन् ।  
शून्य संक्रमित भएको चार मात्र जिल्ला मनाङ, रुकुम पूर्व, बाजुरा र जुम्ला रहेको छ । 

नेपालमा सङ्क्रमण दर १७.८ प्रतिशत रहेको छ ।

हाल होम आइसोलेसनमा तीन हजार ७९ संस्थागत आइसोलेसनमा ५६, आइसियुमा २२ र भेन्टिलेटरमा पाँच जनाको उपचार हुँदैछ । 

विगत २४ घण्टामा आज ५९ हजार ३७८ जनाले खोप लगाएका छन् । अहिले सम्म कुल जनसङ्ख्याको ७५ प्रतिशतले पहिलो मात्रा र ६४.२ प्रतिशतले पूर्ण मात्राको खोप लगाइसकेका छन् ।