काठमाडौँ । सरकारले सार्वजनिक सवारी साधनको भाडा बढाएको छ । पछिल्लो सयम इन्धनको मूल्य बढेको भन्दै सरकारले सवारी भाडा १३ प्रतिशतसम्म बढाएको हो ।

तेलको मूल्य वृद्धि भइरहँदा यातायात व्यवसायीले दबाब दिएपछि सरकारले सार्वजनिक सवारी साधनमा भाडा बढाएको हो । भौतिक पूर्वाधार तथा यातायात मन्त्रालयले मन्त्री स्तरीय निर्णय गर्दै प्रदेश स्तरमा सञ्चालन हुने सार्वजनिक यातायातमा हाल कायम रहेको दरमा ११ देखि १३ प्रतिशतसम्म भाडा वृद्धि गर्ने निर्णय गरेको हो ।

मन्त्रालयले एक प्रदेशबाट अर्को प्रदेशका लागि चल्ने यात्रुबाहक तथा मालबाहक सवारी साधनमा मात्रै भाडा बढाएको यातायात व्यवस्था विभागका महानिर्देशक नमराज घिमिरेले बताए । उनका अनुसार रुटअनुसार बढेको भाडाको दर सूची आइतबार सार्वजनिक गरिने उनले बताए । तर, स्थानीय स्तरमा चल्ने सवारी साधनको भाडा भने नबढ्ने उनको भनाई छ ।

रुस–युक्रेन युद्ध सुरु भएसँगै पछिल्लो समय तेलको मूल्य लगातार वृद्धि भइरहेको छ ।