काठमाडौँ ।  नेकपा एमालेका उपाध्यक्ष तथा पूर्वअर्थमन्त्री विष्णुप्रसाद पौडेलले अब मुलुकको अर्थतन्त्र बचाउन हस्तक्षेप गर्नुपर्ने बताएका छन् । 

एमाले प्रचार विभागले आज यहाँ आयोजना गरेको  मुलुकको वर्तमान अर्थतन्त्रको विषयमा बोल्दै उनले  एमालेको सरकारले मुलुकको अर्थतन्त्र स्वस्थ र सुदृढ अवस्थामा छाडेर गए पनि वर्तमान सरकारले ध्वस्त पारेकोले अब हस्तक्षेप गर्ने बेला आएको बताए । 

समयमै सकारात्मक हस्तक्षेप गर्न सकिएन भने श्रीलंका हुनबाट कसैले रोक्न नसक्ने उनको भनाई रहेको थियो । ‘अहिले नै सकारात्मक हस्तक्षेप नगर्ने हो भने  हामीलाई श्रीलंका हुनबाट कसैले रोक्न सक्ने छैन , ’ उनले भने  ‘अर्थतन्त्रलाई गलत दिशामा जान जुन नीति अवलम्बन गरिएको छ, त्यसको नतिजा भनेको यसैगरी मुलुक संकटउन्मुख हुने हो र हामीले धान्न नसकिने अवस्थामा पुग्ने जोखिम बढेको छ ।’

नेता पौडेलले  ओली नेतृत्वको सरकारले कोभिड अगाडिका सुरूका तीन वर्षमा लगभग ७ प्रतिशत हाराहारीमा आर्थिक वृद्धि गरेको भन्दै अहिले कोभिड नर्मल हुँदा पनि ३ देखि ४ प्रतिशतको मात्र प्रक्षेपण गरिएको बताए । 

सम्मेलनमा एमाले उपाध्यक्ष सुरेन्द्र पाण्डेले सरकारले गभर्नर महाप्रसाद अधिकारीलाई कारवाही गरेर अर्थतन्त्र थप संकटतर्फ धकलेको बताए ।  उनले सरकारसंग ३३ अर्ब पैसा ढुकुटीमा रहेकोे पूजिगत खर्च रोक्नुपर्ने बताए । 

पत्रकार सम्मेलनमा पूर्व अर्थमन्त्री डा. युवराज खतिवडा लगायतको सहभागि रहेको थियो ।