काठमाडौं । सर्वोच्च अदालतले पत्नी हत्याको अभियोग लागेका सशस्त्र प्रहरी बलका पूर्व प्रहरी नायब महानिरीक्षक (डीआईजी)रञ्जन कोइरालाको कैद मिनाहा गर्ने फैसला उल्ट्याएको छ ।

कामू प्रधानन्यायाधीश दीपककुमार कार्की, न्यायाधीशहरु टंकबहादुर मोक्तान र डा कुमार चुडालको पूर्ण इजलासले यसअघि सर्वोच्च अदालतको संयुक्त इजलासले गरेको फैसला उल्ट्याएको सर्वोच्च अदालतका प्रवक्ता विमल पौडेलले जानकारी दिए ।

उनका अनुसार कोइरालाले पूरा २० वर्ष नै जेल बस्नुपर्नेछ ।

यसअघि तत्कालिन प्रधानन्यायधीश चोलेन्द्रशमशेर राणा  र न्यायाधीश तेजबहादुर केसीको संयुक्त इजलासले सजाय बढी हुने भन्दै ८ वर्ष ६ महिना मात्रै कैद सजाय गर्ने फैसला गरेका थिए । सो फैसला लगत्तै कोइराला रिहा भएका थिए ।

उनी अहिलेसम्म साढे ८ वर्षमात्र कैद बसेका छन् ।